ഇന്‍സ്റ്റാഗ്രാം റീലിനായി തിരക്കേറിയ റോഡില്‍ കാര്‍ നിര്‍ത്തി ഗതാഗതം തടസ്സപ്പെടുത്തിയതിന് യുവാവിനെതിരെ ട്രാഫിക് പോലീസ് കേസ്. ഇത് ചോദ്യം ചെയ്യാനെത്തിയ പോലീസുകാരെ ആക്രമിച്ചതായും അധികൃതര്‍ പറയുന്നു. ട്രാഫിക് നിയമം ലംഘിച്ചതിന് പ്രദീപ് ധാക്കയ്‌ക്കെതിരെ 36,000 രൂപ പിഴ ചുമത്തിയതോടൊപ്പം പോലീസുകാരെ ആക്രമിച്ച കേസില്‍ ഇയാള്‍ അറസ്റ്റിലായി.
വാഹനം പിടിച്ചെടുത്ത പൊലീസ് പ്രദീപ് ധാക്കക്കെതിരെ മോട്ടോര്‍ വാഹന നിയമപ്രകാരം കേസെടുത്തു. തിരക്കിനിടയില്‍ ഡല്‍ഹിയിലെ പശ്ചിമ വിഹാറിലെ ഫ്‌ലൈ ഓവറില്‍ കാര്‍ നിര്‍ത്തുന്നതായി പ്രദീപ് ധാക്ക വീഡിയോ അപ്ലോഡ് ചെയ്തിരുന്നു. ഡോര്‍ തുറന്ന് കാര്‍ ഓടിക്കുന്നതും ഇയാളാണ്.
കൂടാതെ, പ്രദീപ് ധാക്ക പോലീസ് ബാരിക്കേഡുകള്‍ക്ക് തീയിടുകയും ദൃശ്യങ്ങള്‍ ഓണ്‍ലൈനില്‍ അപ്ലോഡ് ചെയ്യുകയും ചെയ്തു. പ്രദീപ് ധാക്കയുടെ വാഹനം പിടിച്ചെടുക്കുകയും തനിക്കെതിരെ കേസെടുത്തതും എങ്ങനെയെന്ന് കാണിച്ച് ഡല്‍ഹി പോലീസ് എക്സ് പ്രൊഫൈലില്‍ ഒരു വീഡിയോ അപ്ലോഡ് ചെയ്തു.
പോലീസുകാരെ ആക്രമിച്ചതിന് ഇന്ത്യന്‍ ശിക്ഷാ നിയമത്തിലെ പ്രസക്തമായ വകുപ്പുകള്‍ പ്രകാരം ഇയാളെ അറസ്റ്റ് ചെയ്തിട്ടുണ്ടെന്നും കേസെടുത്തിട്ടുണ്ടെന്നും പോലീസ് പറഞ്ഞു. പ്രദീപ് ധാക്ക തന്റെ സോഷ്യല്‍ മീഡിയ സ്റ്റണ്ടിന് ഉപയോഗിച്ച കാര്‍ അമ്മയുടെ പേരില്‍ രജിസ്റ്റര്‍ ചെയ്തതാണെന്ന് കണ്ടെത്തി. വാഹനത്തില്‍ നിന്ന് ഏതാനും വ്യാജ പ്ലാസ്റ്റിക് ആയുധങ്ങളും പോലീസ് കണ്ടെടുത്തു.